बेथानचोकमा कोसेली घर सञ्चालनमा

ढुंखर्क/बेथानचोक गाउँपालिकामा कोसेली घर स्थापना गरिएको छ । गृहिणी महिलाको सशक्तीकरण गर्ने उद्देश्यका साथ बागमती प्रदेशको सामाजिक विकास मन्त्रालय र बेथानचोक गाउँपालिकाको सहकार्यमा उक्त कोसेली घरको स्थापना गरिएको हो । मन्त्रालयको गृहिणी महिला सशक्तीकरण कार्यक्रमअन्तर्गत स्थापना गरिएको कोसेली घर आइतबारबाट सञ्चालनमा ल्याइएको छ । सामाजिक विकास मन्त्री कन्चनचन्द्र बादेले आइतबार एक कार्यक्रमका बिच कोसेली घरको उद्घाटन गरेका थिए ।

मन्त्रालय र बेथानचोक गाउँपालिकाको लागत साझेदारीमा कोसेली घर निर्माण गरिएको बेथानचोक गाउँपालिका वडा नम्बर १ का वडा अध्यक्ष एवं प्रवक्ता मधुसूदन तिमल्सिनाले जानकारी दिए । प्रदेश सरकारको तर्फबाट १८ लाख २१ हजार रुपैयाँ र गाउँपालिकाको ५० प्रतिशत लागत साझेदारी गरी ३६ लाख ४२ हजार रुपैयाँमा कोसेली घर निर्माण गरिएको उनले बताए । गाउँपालिकाका ११० जना गृहिणी महिलाले उद्यमशीलता तालिम दिएर २ वटा महिला उद्यमी समूह गठन भएको र उक्त समूहलाई १–१ लाखका दरले बिउ पुँजी उपलब्ध गराइएको छ । सो समितिले उत्पादन गरेका वस्तुको विक्रीका लागि कोसेली घर निर्माण गरेर सञ्चालनमा ल्याइएको वडा अध्यक्ष तिमल्सिनाले बताए । कोसेली घरको उद्घाटन गर्दै मन्त्री बादेले कोसेली महिला सशक्तिकरणलाई प्रदेश सरकारले प्राथमिकतामा राखेको उल्लेख गरे । कोसेली घर सञ्चालन पछि स्थानीय उत्पादनलाई बजारसम्म पुर्‍याउने महत्त्वपूर्ण माध्यम बन्ने उनले विश्वास व्यक्त गरे । कोसेली घरलाई व्यवस्थापन गरे अझ प्रभावकारी बनाउन प्रदेश सरकार निरन्तर सहयोग गर्ने मन्त्री बादेले प्रतिबद्धता व्यक्त गरे । कार्यक्रममा बेथानचोक गाउँपालिका अध्यक्ष भगवान अधिकारीले स्थानीय महिलाको आर्थिक सबलीकरण र आत्मनिर्भरता प्राथमिकतामा राखिएको बताए । गृहिणी महिलालाई उत्पादनमूलक कार्यमा संलग्न गराउन र बजारसम्म पहुँच दिलाउन कोसेली घर महत्त्वपूर्ण हुने उनले बताए । पालिका उपाध्यक्ष तारा राणा तिमल्सिनाले महिलाले उत्पादन गरेका सामग्रीलाई स्थायी बजार उपलब्ध गराउन र कोसेली घरमार्फत स्थानीय महिलाहरूले उत्पादन गरेका सामग्री प्रदर्शन र बिक्री गर्न महत्वपूर्ण हुने बताईन । सोहि अवसरमा महिला दिदीबहिनीहरुको मनोपरामर्श तथा तीज विशेष कार्यक्रम समेत आयोजना गरिएको प्रमुख प्रशासकीय अधिकृत राजेन्द्र भण्डारीले बताए ।  जनप्रतिनिधि, समाजसेवी, महिला समूह तथा बेथानचोक बासिको उपस्थिति रहेको थियो। कोसेली घरमार्फत हस्तकला, कृषिजन्य उत्पादन र स्थानीय परिकारलाई प्राथमिकताका साथ प्रवर्द्नले मा सहयोग पुग्ने बताए । उदघाटन कार्यक्रम सगै तीज विशेष कार्यक्रम पनि उत्साहपूर्ण वातावरणमा सम्पन्न भएको थियो।कार्यक्रममा गायक सानु के.सी., राजेन्द्र भण्डारी, गायिका स्मृति गौतम, रिना बिष्टलगायतका कलाकारहरूले तीज गीत प्रस्तुत गरेका थिए।