धुलिखेल – ११ बाट लागूऔषधसहित दुई जना पक्राउ

धुलिखेल/जिल्ला प्रहरी कार्यालय, काभ्रेपलाञ्चोकले लागूऔषधसहित दुई जनालाई पक्राउ गरेको छ । विशेष सुराकीको आधारमा प्रहरीको टोलीले धुलिखेल नगरपालिका–११, बाझोखेतस्थितबाट दुई जनालाई पक्राउ गरेको जिल्ला प्रहरी कार्यालय काभ्रेले जनाएको छ । जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक मिनबहादुर घलेका अनुसार, लागूऔषध नियन्त्रण ब्युरो कोटेश्वर र अस्थायी प्रहरी पोष्ट काभ्रेभन्ज्याङबाट खटिएको संयुक्त प्रहरी टोलीले विशेष सूचनाको आधारमा उक्त स्थानमा सवारी साधन जाँच गर्ने क्रममा मे.१ च. ३५९७ नम्बरको स्कार्पियो गाडीलाई शंका लागेर रोकेको थियो ।

गाडीमा सवार जिल्ला इलाम, रोङ गाउँपालिका–३ निवासी ३२ वर्षीय सुमन राई र चालक इलाम माई नगरपालिका–१ आापटारी निवासी २७ वर्षीय तेजकुमार बराइलीलाई नियन्त्रणमा लिएर खानतलासी गर्दा सुमन राईको साथमा लागू औषध ब्राउन सुगरजस्तो देखिने पदार्थ फेला परेको उनले जानकारी दिए । उनका अनुसार, उक्त पदार्थलाई मान्यता प्राप्त तराजुबाट तौल गर्दा कुल ९ ग्राम १७० मिलिग्राम रहेको पुष्टि भएको छ ।

प्रहरीले लागूऔषधसँगै उनीहरू सवार स्कार्पियो गाडीसमेत बरामद गरेको प्रहरीले जानकारी दिएको छ । हाल दुवै प्रतिवादीलाई म्याद थप गरी काभ्रेपलाञ्चोक जिल्ला अदालतबाट पाँच दिनको म्याद लिई थप अनुसन्धान भइरहेको जिल्ला प्रहरी कार्यालय काभ्रेले जनाएको छ ।