काठमाडौं विश्वविद्यालयमा धमाधम प्रवेश परीक्षा

धुलिखेल÷ काठमाडौं विश्वविद्यालयले मानव सेवाका लागि ज्ञान र प्रविधिको प्रयोग गर्दै विश्वस्तरीय विश्वविद्यालय बन्ने दृष्टिकोणलाई आत्मसात गर्दै, स्नातक तहका कार्यक्रमहरूमा भर्नाका लागि कम्प्युटर आधारित प्रवेश परीक्षा सञ्चालन गरिरहेको छ । यो परीक्षा जुलाई २८ देखि सुरु भई अगस्ट १ सम्म धुलिखेलस्थित केन्द्रीय क्याम्पसमा हुनेछ । परीक्षामा हरेक दिन करिब ३०० विद्यार्थी सहभागी हुँदै आएका छन । प्रवेश परीक्षा इञ्जिनियरिङ र साइन्स अन्तर्गतका स्नातक कार्यक्रमहरूमा भर्ना लिने उद्देश्यले सञ्चालन गरिएको हो । विद्यार्थीहरूले आफ्नो रुचिअनुसार भौतिकशास्त्र, रसायनशास्त्र, गणित वा भौतिकशास्त्र, रसायनशास्त्र, जीवविज्ञान ( विषय संयोजन छनोट गर्न सक्ने सुविधा रहेको छ । विद्यार्थीहरूले परीक्षा सुरु हुनु भन्दा ४५ मिनेट अगाडि नै परीक्षा केन्द्रमा उपस्थित हुनुपर्नेछ । रङ्गीन प्रवेशपत्र अनिवार्य रूपमा ल्याउनुपर्नेछ, साथै नागरिकता, राहदानी वा लाइसेन्सजस्ता मूल परिचयपत्रहरू मध्ये कुनै एक अनिवार्य रूपमा देखाउनु पर्नेछ । परीक्षामा कलम मात्र ल्याउन पाइनेछ भने व्यक्तिगत क्याल्कुलेटरको प्रयोग निषेध गरिएको छ । कम्प्युटरमा उपलब्ध इ बिल्ट क्याल्कुलेटर मात्र प्रयोग गर्न सकिने व्यवस्था गरिएको छ । कम्प्युटर आधारित प्रणालीका कारण परीक्षा सम्पन्न भएपछि विद्यार्थीले तुरुन्तै आफ्नो अंक हेर्न सक्ने छन । जसले प्रक्रियालाई थप पारदर्शी र विद्यार्थीमैत्री बनाएको विश्वविद्यालयको दाबी छ । यसैबीच, बिराटनगर र बुटवल केन्द्रमा प्रवेश परीक्षा सम्पन्न भइसकेको छ भने हाटिबन कला र शिक्षाशास्त्र स्कुल तथा धुलिखेल क्याम्पसमा परीक्षा अझै सञ्चालनमा छ । काठमाडौं विश्वविद्यालयले प्रविधियुक्त, पारदर्शी र विद्यार्थी(कैन्द्रित भर्ना प्रक्रियालाई निरन्तरता दिँदै आएको जनाएको छ ।