बेथानचोक गाउँपालिकाले गर्यो २३९ विपद् प्रभावितलाई पहिलो किस्ता निकासा

ढुंखर्क/ बेथानचोक गाउँपालिकाले बाढी पहिरो प्रभावितलाई अस्थायी आवास निर्माणका लागि पहिलो किस्ता निकासा गरेको छ ।
संघीय सरकारले अस्थायी आवास निर्माणका लागि ५० हजार रुपैयाँ दिने निर्णय गरेको थियो । सोही अनुसार अस्थायी आवास निर्माणका लागि सूचना प्रणालीमा प्रविष्ट भएका बेथानचोक गाँऊपालिका भित्रका २३९ जना लाभग्राहीहरुको अस्थायी आवास निर्माणका लागि पहिलो निकासा भएको हो ।

पहिलो किस्ता वापत प्रतिव्यक्ति २५ हजारका दरले सम्बन्धित लाभग्राहीहरुको खातामा निकासा गरिएको बेथानचोक गाउँपालिकाका प्रमुख प्रशासकीय अधिकृत राजेन्द्र भण्डारीले जानकारी दिनुभयो । कार्य सम्पन्न भएपछि दोस्रो तथा किस्ता बापतको रकम सम्बन्धित लाभग्राहीको बैंक खातामा निकासा हुने प्रमुख प्रशासकीय अधिकृत भण्डारीले बताउनु भयो ।

सरकारले बेथानचोक सहित तेमाल, रोशी गाउँपालिका तथा पनौती र नमोबुद्ध नगरपालिकालाई अतिप्रभावित पालिका घोषणा गरेको थियो । बाढी पहिरोमा घरबास गुमाएका प्रभावितलाई यसअघि रोशी गाउँपालिकाले पहिलो किस्ता बापतको रकम निकासा गरिसकेको छ ।