काभ्रेमा क्यान्सरविरुद्ध एचपिभी खोप अभियान सुरु

धुलिखेल/ एचपिभी ह्युमन प्यापिलोमा भाइरस विरुद्धको राष्ट्रिय खोप कार्यक्रमअन्तर्गत मंगलवारवाट काभ्रेमा पनि निशुल्क खोप अभियान सुरु भएको छ । जिल्लास्तरिय खोप समन्वय समितिले मंगलबार धुलिखेल–७ स्थित सञ्जीवनी माविमा औपचारिक कार्यक्रमसहित एचपिभी खोप कार्यक्रम शुरुवात गरेको हो । अन्य जिल्लामा फागुन ६ गतेसम्म एकैपटक सञ्चालन हुने खोप काभ्रेमा दुई चरणमा लगाउने तषरी छ । जिल्लास्तरिय खोप समन्वय समितिको निर्णयअनुसार सहज व्यवस्थापनका हिसाबले कार्यक्रम दुई चरणमा हुने र तोकिएको समयभित्रै खोप सम्पन्न हुने गरी योजना बनाइएको जनस्वास्थ्य कार्यालय प्रमुख रागीश्री कक्षपति श्रेष्ठले जानकारी दिनुभयो । धुलिखेल, बनेपा, पनौती, पाँचखाल, बेथानचोक, महाभारत र खानीखोलामा पहिलो चरणमा २९ गतेभित्रै र नमोबुद्ध, मण्डनदेउपुर, भुम्लु, तेमाल, रोशी र चौंरीदेउरालीमा फागुन १–६ गतेभित्रै एचपिभी खोप लगाइने योजना स्वीकृत भएको छ । जिल्लाका दुई सय ५२ सामुदायिक विद्यालय तथा ८४ निजी विद्यालयका १५ हजार छ सय ७४ छात्रा र विद्यालय बाहिर रहेका चार सय ३९ किशोरी गरी १६ हजार एक सय १३ जनालाई खोप लगाउने तयारी छ । जिल्लास्थित १३ स्थानीय तहमा कक्षा ६ मा अध्ययनरत तीन हजार ३ सय ५० र कक्षा ७ देखि १० का १२ हजार तीन सय २४ गरी विद्यालय तहमा १५ हजार छ सय ७४ छात्रालाई खोप लगाइने छ ।यस्तै, विद्यालय बाहिर रहेका १० वर्षदेखि १४ वर्ष उमेर समूहका ४ सय ३९ किशोरीलाई खोप लगाउने लक्ष्य छ । सबैभन्दा बढी बनेपामा ४ हजार २९ जनालाई खोप लगाइँदैछ भने सबैभन्दा कम ४ सय ५० जनालाई चौंरीदेउरालीमा लगाइँदैछ । स्तै, पनौतीमा २ हजार ४ सय ९५, पाँचखालमा १ हजार ४ सय ७६, धुलिखेलमा १ हजार ४ सय १६ र रोशीमा १ हजार १ सय ४८ जनालाई खोप लगाइँदैछ । मण्डनदेउपुरमा ९८०, नमोबुद्धमा ९७२, महाभारतमा ८७६, खानीखोलामा ६७६, बेथानचोकमा ६२८, भुम्लुमा ५२८, तेमालमा ४८७ जनालाई खोप लगाइँदैछ ।